Тои же веснѣ преставися архиепископъ Нифонтъ новгородчкыи, априля въ 21: шелъ бо бяше къ Кыеву противъ митрополита; инии же мнози глаголаху, яко, лупивъ святую Софѣю, пошелъ къ Цесарюграду; много глаголаху на нь, нь собѣ на грѣх. О семъ бы разумѣти комуждо нас: которыи епископъ тако украси святую Софѣю, притворы исписаа, кивот створи и всю извну украси; и въ Пьсковѣ святого Спаса церковь созда камену, другую в Ладозѣ святого Климента. Мню бо, яко не хотя богъ, по грѣхомъ нашимъ, дати нам на утѣшение гроба его, отведе и къ Кыеву, и тамо преставися; и пакы ту положиша и в Печерьстѣмъ манастырѣ.